السلام عليكم ورحمة الله وبركاته
على الحكام ان توكف قصاص اليوم
ومن موسى بن جعفر تاخذ العبره
لان منطي عبر ودروس للظلام
والما يفهم احنه نفهمه شيقره
راح اربط الكاظم بالسياسه اليوم
واستخلص درس من صاحب الذكره
صار عناد ما بين الصبر والباب
ياهو اليكدر عالثاني ويكسره
وكف هارون حشد عسكر عالباب
والكاظم وكف ويحشد بصبره
دارت معركه امتدت سنين عجاف
والسجان واكف حاير بامره
من عظم الصبر متهستر السجان
محني الظهر وابيض منكلب شعره
سمع بالخبر ايوب واجه لبغداد
جايب صبره للكاظم اجه اينصره
شاف الصبر جيش وموسى خلف الجيش
صاح الله واكبر جيشك شكبره
اهتز باب السجن والصبر اليهز بيه
ومرعوبه العساكر كلها منتشره
انقلع باب السجن والصبر كام يصيح
اطلع يابن جعفر نجحت الثوره
طلع موسى بن جعفر والصبر وياه
وترفرف من بعيد جنازته الخضره
نزل فوك الجسر والجسر جلب بيه
مايقبل يفكه وحاضنه بصدره
وكام الجسر يصرخ من بده التشييع
ياموسى الجسر بعدك محد يعبره
نزلوا الانبياء والرسل بالتشييع
وعلى موسى الرضا متكفل بكبره
شما تمشي الجنازه شبر فوك الكاع
قصر هارون يوكع متر من قصره
لحد ما وصل كبره القصر كله نشال
وطشوا صبره فوك وخضرة حضره
نعشك مو نعش كعبه ومشت عالكاع
شما يوكف عليها الناس مفتره
بغداد بكبرها امتلت بالزوار
وزوارك اجتك من سما البصره
لذلك امس شفنه عالجسر هارون
على زوراك رجع يتفنن بغدره
شوكه بعينه صارت كثرة الزوار
ولان صبرك جثير وجتك الكثره
زرع بيهم رعب عالجسر يامولاي
وخذ الالاف من شيعتكم الفقره
الجسر يعتذر منك سيدي ومولاي
ما لحك يلم زوارك بكتره
الجسر دنك عليهم يبجي عالشبان
والجرف استحه ومن مايه تبره
المن حاطيك تبلع الزوار
لومايك تريد بدمهم تحمره
الجسر عاف الزم ضل يبجي عالنسوان
المدري تعوف ابنها مدري تشمره
تالي جيتن وياهن الاطفال
وصاحن فدوه الك ياسابع العتره
وهنه مجيتات يحاجن الاطفال
بس نوصل الماي نصافح الزهره
بس نوصل الماي نصافح الزهره
مع تحياتي
بنت دجله
